Видео. Кыргыз-тажик чек арасындагы атышууда чек арачы менен милиция жарадар болду

Бүгүн, 23-июлда саат 7:30га карата кыргыз-тажик чек арасында абал туруктуу. Бул тууралуу Ички иштер министрлигинин басма сөз кызматы кабарлады.

Чек арадагы кезектеги чатак кечээ, 22-июлда саат 17:20 чамасында болгон. Тажикстандын Ворух айылынын жашоочулары айылдын кире беришине флагшток орнотушкан. Ага Баткендин Ак-Сай айылынын жашоочулары нааразычылык билдиришип, чатак чыккан. Анын натыйжасында жарандардын бири курал колдонуп, ок чыгарган.14 адам жабыркаган. Алардын арасында чек арачы жана милиция кызматкери бар.  

Болжол менен саат 19:30да абал курчуп кеткен жана атышуу болгон.  

Азыркы учурда калк арасында түшүндүрүү иштери жүргүзүлүүдө. Учурда Исфара-Ворух жолу жабылды. Окуя болгон жерге чек ара кызматынын жана укук коргоо органдарынын өкүлдөрү барып, күчөтүлгөн тартипте иш алып барып жатышат. Ошондой эле эки өлкөнүн жергиликтүү өкүлдөрү сүйлөшүүлөрдү жүргүзүп жатат.