Мирлан Бакиров нааразы болгондорду эмнеге "Памирге баргыла" деген сөзүнө түшүндүрмө берди

Жогорку Кеңештин төрагасынын орун басары, депутат Мирлан Бакиров парламенттин жалпы жыйынында Кыргызстандагы жашоого нааразы болгондорду Памирге барып келгиле деп айткан сөзүнө түшүндүрмө берди. Аны парламенттин маалымат кызматынын башчысы Ибраим Нуракун уулу Жогорку Кеңештин социалдык тармактагы баракчасына койду.

Депутат өз сөзүндө ал Кыргызстандын бардык жаранын Памирге баргыла деп айтпаганын белгиледи.

"Эгер ошол видеону башынан аяганы чейин саресеп салып карап чыкса "нааразы болгондор болсо" деген сөз айтылды. Ал жерде бүгүнкү күнү Улуу жана Кичи Памирден көчүрүп келген этникалык кыргыздардын шарты мамлекет тарабынан колдоо боюнча айтылып кеткен. Эгерде ар бир кыргызстандыкмын деген адам Кыргызстан үчүн салым кошсо албетте мамлекет өнүгөт. "Жаман" дей берсек, "жок" дей берсек анда жакшысын бизге бирөө береби? Кээ бир топтор бар деги эле туулганына нааразы болгон. Эки жакты караш керек...", — деди ал.

Бакиров андан сырткары 21-кылымда Кыргызстандын эли мындан да жакшы жашагысы келерин, бирок ошол эле мезгилде тарыхты унутпашыбыз керектигин кошумчалады. Депутат андан сырткары жарандарга памирлик кыргыздардын жашоосун көз алдынан өткөрүп көрсүнчү деген ой менен айтылганын белгиледи.

Төраганын орун басары андан сырткары, социалдык тармакта "Бакиров өзү биринчи Памирге барып келсинчи" деген сын-пикирлерге дагы жооп берди.

"2012-жылы мен палатада ушул маселени көтөрүп, 2013-жылы атайын экспедиция уюштурулуп мен башында туруп Улуу жана Кичи Памирге гуманитардык жүк жеткирилген Мамлекеттик кызматкерлер, медицина жана журналисттер да барып келгенбиз. 2014-жылы да барып келгем, жеринде жашоосун көрүп, жон терим менен сезгем. Менин да Кырызстанга болгон жеке көз карашым, экспедициянын мүчөлөрүнүн көз карашы таптакыр башка болгонуна күбө болгом", – деди ал.

Бакиров парламенттин 23-январдагы жыйында Кыргызстандагы жашоого нааразы болгондорго Памирге бир жумага жолдомо алып, жөнөтүү керектигин айткан. Эл өкүлүнүн мындай сунуш социалдык тармакта ар кандай талкууларга жем таштады.