Кумтөрдө табылбай калган кызматкерлерге жаназа окулган маалдын сүрөттөрү тарады

Кумтөр кенинде жер кыртышы басып калган эки кызматкерди издөө аракеттери токтотулганы менен, окуянын себебин аныктоо аракеттери улантылып жатат. Бул тууралуу өкмөттүн Ысык-Көлдөгү ыйгарым укуктуу өкүлү Акылбек Осмоналиев билдирди.

"Каргашадан кийин дароо эле республикалык штаб түзүлүп, күнү-түнү иш алып барды. Президент Сооронбай Жээнбековдун көрсөтмөсү менен абалды премьер-министр Мухаммедкалый Абылгазиев жеке көзөмөлгө алды. Издөө-куткаруу иштерине 146 киши тартылды. Анын ичинде ӨКМдин, "Кумтөр Голд Компани" компаниясынын кызматкерлери, ыктыярчылар, маркумдардын жакындары да тартылган", — деди ал.

Белгилей кетсек, 2019-жылдын 1-декабрында Кумтөрдө жер көчүп тоо мастери Өмүрбек Ишенбеков жана машинист-бульдозерчи Жолдошбек Жунушов жоголуп кеткен. Аларды издөө аракеттери 9-январда токтотулуп, 10-январда жаназасы окулган болчу. 

Осмоналиев андан сырткары учурда "Кумтөр Голд Компани" компаниясынын жетекчилиги менен маркумдардын айылына эки бала бакча куруп берүү демилгеси талкууланып жатканын кошумчалады.