Журналистке кол салып акча, телефонун тартып алган жаран кармалды

Бишкекте журналист Бактурсун Жоробековго кол салып, телефонун жана акчасын тартып алган жарандар кармалды. Бул тууралуу Ленин РИИБнин маалыматына таянып “Барометр” билдирет.

Милиция кызматкерлери каракчылыкка шектүүнү кармашкан.

“ 27-октябрында жаран Ж.Б. аттуу белгисиз адамдарга карата чара көрүү өтүнүчү менен кайрылган. Анда, үстүбүздөгү жылдын 26-октябрында саат 23:00 чамасында борбор калаанын көчөлөрүнүн биринен физикалык күч колдонуп, ачык түрдө 10 миң сомдук “Самсунг галакси J2” уюлдук телефонун жана 3 миң 500 сом өлчөмүндөгү накталай акчасы бар капчыгын тартып алышып,  белгисиз тарапка качып кетишкен.

Аталган факт Ленин РИИБдин кылмыштардын бирдиктүү реестерине катталып, Кыргыз Республикасынын  Жазык кодексинин 206-беренеси (Каракчылык) менен кылмыш иши козголгон.  

Жүргүзүлгөн иликтөө жана ыкчам-издөө иш-чараларынын жүрүшүндө Бишкек шаарынын ИИББгы жана Ленин районунун ИИБнын ыкчам кызматкерлери тарабынан кылмышка катыштыгы бар шектүүлөрдүн  бирин изи сууй электе 2000-жылы туулган  А.К. кармалып, Ленин РИИБдин Тергөө кызматына жеткирилген. 

Андан соң,  Кыргыз Республикасынын  Жазык-процесстик кодексинин 96-беренесине ылайык, Бишкек шаарынын ИИББнын убактылуу кармаачу изоляторуна  киргизилип, Бишкек шаарынын Ленин райондук соту  тарабынан шектүүгө карата Бишкек шаарынын СИЗО-1 абагына бир айга камакка алуу түрүндөгү баш коргоо чарасын тандалган.

Учурда, милиция кызматкерлери тарабынан экинчи шектүүнүн дарегин аныктоо жана кармоо боюнча ыкчам-иликтөө жана издөө иш-чаралары улантылууда”, -деп айтылат маалыматта.