Япондор 2035-жылга чейин Айга суутек отунун өндүрүүчү завод ачат

Япониянын аэрокосмостук чалгындоо агенттиги Айга суутек отун заводун 2035-жылга чейин курууну пландап жатат. Бул тууралуу 28-сентябрда Киодо агенттиги жазып чыккан маалыматка шилтеме берип “Барометр” билдирет.

Ишкана Жердин спутнигинин түштүк уюлуна жакын жайгашат. Алдын ала божомолдор боюнча, ал жакта ичүүчү суу, кычкылтек жана суутек алына турган муз катмарлары бар. Өндүрүлгөн суутек отуну Айдын өзүнө саякаттоо үчүн жана анын айланасында космостук станция менен учуу үчүн күйүүчү май катары колдонулушу мүмкүн.

Окумуштуулардын алдын-ала эсептөөлөрү боюнча, бул ишкананы ачуу үчүн 21 тоннадан 37 тоннага чейин суу талап кылынат. Мындай заводдун ачылышы жерден күйүүчү майды ташып баруу чыгымдарын бир кыйла төмөндөтүүгө мүмкүндүк берет. Мындан тышкары, долбоорду ийгиликтүү ишке ашыруу Айды жана космосту изилдөө темпин тездетүүгө жардам берет.

Мындан тышкары, Япония АКШ менен орбиталык космос станциясынын курулушу боюнча кызматташууну пландаштырууда.

2019-жылы Япония NASAнын Ай программасына кошулуу чечимин жарыялаган. Япониянын Билим берүү, Маданият, Спорт, Илим жана Техника министрлиги менен NASA Жердин табигый спутнигин изилдөө жаатында кызматташуу жөнүндө келишимге кол коюшкан.

21-сентябрда NASA өзүнүн Ай программасы боюнча жаңыртылган планын сунуштады ("Артемида"), анын биринчи этабы эми 2021-жылга, экинчиси 2023-жылга пландаштырылган. Миссиянын үчүнчү баскычы деп эсептелген Айга өзү конуу, мурда пландаштырылгандай, 2024-жылы болушу керек.