Сокулукта аял киши ири өлчөмдө уурулук кылып, өзүнө унаа сатып алган

Сокулук районунда өзгөчө ири өлчөмдөгү уурулук жасап, уурдалган буюмдар менен автоунаа сатып алган шектүү кармалды. Бул тууралуу Чүй ОИИБдин маалыматына шилтеме берип “Барометр” билдирет.

Маалым болгондой, 16-октябрда Сокулук райондук ички иштер бөлүмүнө айыл тургуну арыз менен кайрылган. 

“Сокулук районунун жараны 1984-жылы туулган жараны үйүнөн ири өлчөмдөгү акчасын уурдатканын айтып милицияга кайрылган. 
15-октябрь күнү саат 18:00дөн 02:00гө чейинки аралыкта анын үйүнө белгисиз адамдар жашыруун кирип, уктоочу бөлмөсүнөн 2 000 000 сом, 4 000 000 рубль, 5500 АКШ доллары жана зер буюмдарын уурдап кеткен.

Аталган факты Сокулук райондук ички иштер бөлүмүнө катталып, КР Кылмыш-жаза кодексинин 205-беренесинин (уурдоо) негизинде кылмыш иши козголгон.

17-октябрда Чүй облусунун ИИБнын жана Сокулук райондук ички иштер бөлүмүнүн кызматкерлери тарабынан жүргүзүлгөн комплекстүү тергөө-ыкчам иш-чараларынын натыйжасында кылмышка шектүүнүн өздүгү такталып, кармалган. 
Шектүү катары 1984-жылы туулган А.М. аттуу жаран кармалды. 
Шектүү КР Кылмыш-жаза кодексинин 96-беренесине ылайык, кармалып, убактылуу кармоочу жайга киргизилген.

Иликтөө иштеринин жүрүшүндө кылмышка шектүү жабырлануучуга тиешелүү зер буюмдарын жана акча каражаттарын өз ыктыяры менен тапшырып, калган акчага 2016-жылы чыгарылган «Тойота Камри» үлгүсүндөгү унаа сатып алгандыгын айткан. Учурда тергөө иштери уланууда”, -деп айтылат маалыматта.