Наристенин төрөлгөнүнө 6 ай өтсө, анда сүйүнчү пул берилбейт

Эгер ымыркайдын төрөлгөнүнө 6 ай өтсө, анда ага мамлекет тарабынан сүйүнчү берилбейт. Бул тууралуу социалдык камсыздоо департаментинен билдиришти.  

Маалым болгондой, үстүбүздөгү жылдын 1-апрелинен тарта “Пособиялар жөнүндө” мыйзамына толуктоолор киргизилди. 

Ага ылайык, “балага сүйүнчү” бир жолку төлөмдү алуу үчүн ата-эне баласына 6 ай толо электе кайрылышы керек. Өзгөртүүлөр киргизиле электе, бул мөөнөт 1 жылга барабар болчу. Андыктан, ата-энелерге жарым жылга чейин арыз менен кайрылуу сунушталат.   

Белгилеп кетсек, материалдык абалына карабай, ар бир балалуу болгон үй-бүлөгө мамлекет тарабынан 4 миң сомдон сүйүнчү пул берилет.