Бишкекке дагы 10 литрден болгон 78 кычкылтек концентратору келди

Кытайдан 78 кычкылтек концентратору келди. Бул тууралуу өкмөттүн маалымат кызматына таянып "Барометр" билдирет. 

КРнын Тышкы иштер министрлигинин көмөгү менен Кытай Эл Республикасынан Бишкек шаарына кечээ, 2-августта чартердик рейс менен ар бири 10 литрден болгон 78 кычкылтек концентратору жеткирилди.

"Жаңы аппараттар республикалык бюджеттин эсебинен сатып алынып, аймактарга бөлүштүрүү үчүн Саламаттык сактоо министрлигине өткөрүлүп берилди", - деп айтылат маалыматта.

Белгилей кетсек, буга чейин Кытайдан ар бири 5 литрден болгон 1 500 кычкылтек концентратору алынып келинген. Мындан тышкары өткөн жумада 10 литрликтен 40 даана концентратор жеткирилген. Ушул аптада ушундай эле көлөмдөгү 350 жаңы аппарат келээри күтүлүүдө. Жалпысынан Кыргызстан Кытайдан 2000 кычкылтек концентраторун сатып алды.