Гимнаст кыз Элизаны 100 милиция кызматкери түнү бою издешти

Бишкектин милиция кызматкерлеринин издөө иштери 13 жаштагы Элизаны табууга көмөк берди. Бул тууралуу Бишкек шаардык ички иштер башкы башкармалыгынын басма сөз кызматы кабарлады.

8-майда Бишкек шаарынын Октябрь райондук ички иштер башкармалыгына Бишкек шаарынын тургуну К.Р. 2005-жылы туулган кызы М.Э. жоголуп кеткенин айтып арыз менен кайрылган. Ал эртең менен окууга кетип, түштөн кийин чейин поликлиникага процедура үчүн кеткен. Акыркы ирет аны болжол менен саат 13:30дан 14:00гө көрүшкөн. Октябрь ИИБи менен Бишкек ШИИБинин кызматкерлери токтоосуз түрдө ыкчам издөө иштерине киришкен.

Активдүү издөө иштери 8-майда саат 19:45те башталып, 9-майда 06:30га чейин уланды. Кызматкерлер өспүрүмдүн ата-энеси менен биргеликте Бишкек шаарындагы 6-микрорайондон кызды аман-эсен табышты. Азыркы учурда М.Э ата-энеси менен үйдө.

Кечки жана түнкү издөө иштерине 100дөн ашык милиция кызматкерлери тартылды.

Кечээ маалымдалгандай, 2005-жылы туулган, көркөм гимнастика менен машыккан Элиза Максытова Бишкекте дайынсыз жоголуп кеткен.