“Альянс Алтын” Таласка таштандыларды кайра иштетүүчү завод курууга 6 миллион сом бөлдү

Жерүй алтын кенин иштетүүчү “Альянс Алтын” компаниясы “Альянс Алтын” өнүктүрүү фонду аркылуу Талас шаарындагы таштандыларды кайра иштетүүчү заводдун курулушун каржылады.

Заводдун курулушуна “Альянс Алтын” өнүктүрүү фондунан 6 миллион сом бөлүнгөн. “Альянс Алтын” өнүктүрүү фонду 2016-жылы  Жерүй тарабынан түзүлгөн.  

2016-жылдан бери Талас облусун өнүктүрүүгө 900 миллион сом бөлүнгөн.

Фонддун жетекчиси Батырбек Качкымбаев менен президенттин Талас облусундагы ыйгарым укуктуу өкүлү Бакытбек Нарбеков 1-декабрда таштандыларды кайра иштетүүчү жаңы ишкана курулуп жаткан таштанды төгүүчү жайга барышты.    


Заводдун курулушуна фонддун каражаттарынан жеке ишкерге 6 миллион сом бөлүнгөн.  

Президенттин облустагы өкүлү аймактагы таштанды маселесин комплекстүү чечүү зарылдыгын белгиледи. Анын айтымында, бул маселени чечүүнүн биринчи кадамы Беккари чуңкурунун курулушу болуп, буга 1 млн 400 миң сом сарпталган. Беккари карьери утилизациялоо үчүн атайын жабдылган объект болуп саналат. Экинчи этапта 6 миллион сомдук таштандыларды кайра иштетүүчү заводдун курулушу жүрүп жатат.

1-декабрда аталган фонддун жетекчиси жана облустагы ыйгарым укуктуу өкүл фонддун эсебинен курулуп жаткан башка социалдык объектилер менен да таанышты.

Алсак, 1-декабрда Кара-Суу айылындагы Батырбек Качкымбаев менен Бакытбек Нарбеков 100 абонентти электр жарыгы менен камсыз кыла турган 8 миң метр электр чубалгысын тартууну көзөмөлгө алышты.

Ошондой эле, облус жетекчиси жана фонддун жетекчиси Нуржанов айыл өкмөтүндөгү спорт комплексинин курулушу менен таанышты. Спорттук жайды курууга фонддон 2 миллион 100 миң сом бөлүнгөн. Курулуш иштери, айыл өкмөт башчысынын айтымында, 2023-жылдын биринчи кварталында бүткөрүү пландалууда.

Андан соң фонддун жетекчиси жана облустагы ыйгарым укуктуу өкүл Бака-Ата районунун Боо-Терек айылындагы Бейшен Сатыбеков атындагы орто мектепте болуп, мугалимдерге 5 ноутбук тапшырды. Бакытбек Нарбеков билим берүүгө өзгөчө көңүл буруунун маанилүүлүгүн белгилеп, бул мектептеги окуу шарттары менен таанышты.

Андан ары фонддун жетекчиси жана ыйгарым укуктуу өкүл Кара-Бура районунун Бейшек айыл өкмөтүнө караштуу Кара-Суу айылында болуп, 4,5 чакырымга созулган электр чубалгысын тартуу иштерин көзөмөлгө алды. Ошондой эле Шекер айылында жаңы спорт комплексинин курулушу кандай жүрүп жатканы көрсөтүлүп, ага «Альянс Алтын» фондунан 980 миң сом бөлүнгөн. Кошумчалай кетсек, аталган айылда фонддун атынан үй бүлөлүк дарыгерлер тобунун дарыгерлерине компьютерлердин сертификаттары тапшырылды.