Алмамбет Шыкмаматов: Атамбаев учурунда мөңгүлөрдү талкалоого багытталган мыйзамды коркутуп –үркүтүү жолу менен өткөрүп алган

Давыдов жана Лысый мөңгүлөрүн талкалоого багытталаган мыйзамды өз убагында мурунку президент Алмазбек Атамбаев депутаттарды коркутуп –үркүтүү жолу менен кысым көрсөтүп жатып кабыл алдырган. Бул тууралуу Barometr.kg  сайтына «Ата Мекен» фракциясынын лидери Алмамбет Шыкмаматов бүгүн, 1 февралда  билдирди.

«Бүткүл дүйнөдө мөңгүлөрдү сактоого багытталган иш аракеттер көрүлүп, алардын жоголушу глобалдык маселе катары каралып келет. Тилекке каршы, бизде улуттук сыймыгыбыз, байлыгыбыз болгон мөңгүлөрдү талкаланышына өзүбүз жол берип жатабыз», - деп билдирди Алмамбет Шыкмаматов.

Эл өкүлүнүн айтымына караганда, 2017 жылы «Кыргыз Республикасынын Суу Кодексине өзгөртүүлөрдү киргизүү» тууралуу мыйзамы ошол кездеги өлкө башчысы Алмазбек Атамбаевдин депутаттарга карата көрсөткөн кысымынын негизинде кабыл алынган.

«Ошол кезде мыйзамды Атамбаев коркутуп- үркүтүү жолу менен, башкача айтканда депутаттарга кысым көрсөтүп кабыл алдырган. Ошондо эле «Ата Мекен» мындай чечимге каршы чыккан. Эми биз мөңгүлөрдү сактоого багытталган мыйзам долбоорун иштеп чыктык. Аны эл өкүлдөрү колдойбу, колдобойбу убакыт көрсөтөт», - деп билдирди Шыкмаматов.

Эскерте кетсек, 2017 жылдын 16- ноябрында Жогорку Кеңеш 3 окууда  Кумтөр компаниясына Давыдов жана Лысый мөңгүлөрүнүн аймагында  иш алып барууга уруксат берген “Кыргыз Республикасынын Суу Кодексине өзгөртүү киргизүү тууралуу" мыйзам долборун көпчүлүк добуш менен колдоп берген.  Ушул эле жылдын 24- ноябрында ал кезде өлкөнү акыркы күнү  башкарып турган Алмазбек Атамбев мыйзамга кол койгон.