Ош шаарында 40 миңден ашык жасалма алкоголсуз суусундук тартылып алынды

Мамлекеттик салык кызматынын төрагасы Алмамбет Шыкмаматов Ош шаарына болгон иш сапарынын алкагында акциздик маркасы жок товарларды аныктоо боюнча рейд өткөрдү.

Ош шаарынын Курманжан Датка көчөсүндөгү жеке ишкерлер У.А.Э. жана С.М.ге таандык ири соода түйүндөрүндө жүргүзүлгөн текшерүү маалында жалпы суммасы 142 811 сомду түзгөн 3 767 даана жасалма суусундуктар табылган.

Аталган продукциялар товардык продукциясына дал келбеген жана шайкештик тастыктамасына ээ эместиги аныкталды. Бул  «Акциздик маркалар менен маркалоо тартиби жөнүндө» Жобого ылайык, маркасы жок продукция катары каралат.

Рейддин жыйынтыгында Салык кызматынын төрагасы мекеменин кызматкерлерине бул суусундуктарды жеткирген тараптарды аныктап, Кыргыз Республикасынын мыйзамдарынын алкагында тиешелүү чараларды көрүүнү тапшырган.

Андан соң бул продукциялар «Ан Империя» ЖЧК тарабынан алып келингени белгилүү болду.

Анын кампасына жүргүзүлгөн салыктык рейд учурунда жалпы суммасы 1 млн 458 миң 858 сомду түзгөн 37 014 даана алкоголсуз жасалма суусундук табылды.

Табылган товарларда дагы чапталган акциздик маркасы товардын аталышына туура келбеген жана шайкештик тастыктамасы жок болуп чыкты.

Аталган продукциялар толугу менен кампадан жана жүгүртүүдөн алынды.

Аталган фактылар боюнча алгачкы процессуалдык документтер толтурулуп, материалдар укук коргоо органдарына укуктук баа берүү үчүн даярдалууда.