Жоломан Шаршенбеков ирандык балбанга жеңилип калды

26-28-февраль күндөрү Украинанын Киев шаарында өткөн күрөш боюнча эл аралык мелдеште Жоломан Шаршенбеков күмүш медаль тагынды. Бул тууралуу Спорттук күрөш боюнча федерациясынын маалымат кызматына шилтеме берип “Барометр” билдирет.

Белгилей кетсек, Киев шаарында спорттук күрөштүн түрлөрү боюнча Украинанын атактуу балбандарынын жана машыктыруучуларынын элесине арналган XXIV эл аралык мелдеш өттү.

Мелдеште Жоломан Шаршенбеков 60 килограмм салмакта килемге чыкты.

Шаршенбеков 1/16 финалдан баштап, алжирдик Абдельжеббар Джеббарини 6:2 эсебинде жеңип алган. 

Чейрек финалда Шаршенбеков Европа жана дүйнө чемпиону болгариялык Иво Ангеловду 5:0 эсебинде жеңген.

Жарым финалдык беттеште украиналык Виктор Петрык менен бет келип, аны 12:4 эсебинде жеңип алды.

Финалдык беттеште Шаршенбеков ирандык Али Реза Неджатиге каршы күрөшүп 1:5 эсебинде жеңилип калды. Ошентип, Жоламен Шаршенбеков Украинадагы эл аралык мелдеште күмүш медалдын ээси болду.