Ысык-Көлдө коронавирустун кайрадан жайылышына жол бербөө үчүн чаралар күчөтүлдү

Учурда Ысык-Көл ОИИБы боюнча Жол кыймылынын коопсуздугун камсыздоо бөлүмүнүн кызматкерлери коронавирус илдетинин кайрадан пайда болушуна жол бербөө, алдын алуу максатында өзгөчө кырдаал тартиби киргизилген Балыкчы шаарында “Ак-Кеме” жана Тоң районунун аймагында “Кызыл-Омпол- 2" санитардык-карантиндик посттордо жана башка облус аймактарында 12 филтирациялык посттордо 1-2-нөөмөттө, күнү-түнү дебей, жалпысынан 33 кызматкер кызмат өтөөдө.  Бул тууралуу ИИМдин ЖКККББы Басма сөз кызматы билдирди. 

Ысык-Көл облусунун өзгөчө кырдаал тартиби киргизилген аймактарда тамак-аш, медкаражат, кийим кече ж.б. күнүмдүк колдонулуучу товарларга өтө муктаж адамдарды камсыз кылуу үчүн ташылып келе жаткан товарларды посттордон тоскоолдуксуз өтүүсү камсыздалынууда. Ошондой эле, турак жай-коммуналдык кызмат көрсөткөн компаниялардын, мекеме-ишканалардын автоунаалары, жазгы талаа жумуштарын жүргүзүп жаткан айыл чарба техникаларын, мал жандыктарына тоют ташыган автоунааларды да кызмат учурунда тоскоолдуксуз өткөрүү камсыздалууда.

Мындан тышкары облус аймагында жыйырма кызматкерден турган мобилдик топ коронавирус илдетин кайрадан пайда болуп, жайылып кетүүсүн алдын алуу, айдоочуларга жана унаа ичиндеги жүргүнчүлөргө өзгөчө кырдаал тартибинин талаптарын жеткирүү иштерин үзгүлтүксүз жүргүзүүдө.

Жалпысынан облустук жол көзөмөлчүлөр тарабынан ар кандай жол кыймылынын эрежелерин одоно бузган 1174 айдоочуга карата бузуулар тууралуу протоколдор түзүлгөн, алардын ичинде 50дөн ашыгы унааны алкоголдук ичимдик ичип алып башкаргандар. Баардык жол кыймылынын эрежелерин бузган айдоочуларга Кыргыз Республикасынын Бузуулар жөнүндө Кодексинин негизинде чара көрүлүүдө. Облус аймагында жол кырсыктарынын саны үч эсе кыскарды.