Ырчы Асель Кадырбекова жакын арада чоң кайрымдуулук иш жасай турганын айтты

Ырчы Асель Кадырбекова акыркы учурда андан жардам сурап кайрылгандар көп болуп жаткандыктан, инстаграм баракчасы аркылуу оюун уюштуруп, андан түшкөн акчага чоң кайрымдуулук жасагысы келип жатканын айтты. Бул тууралуу анын соцтармактагы баракчасына жарыяланган маалыматка шилтеме берип “Барометр” билдирет.

“Элдин батасы менен жакшы болуп келе жатам. Кудайым буюрса азыркыдан да жакшы болгум келет. Албетте, сиздердин батаңыздар менен. Конкурстан түшкөн акчага чоң кайрымдуулук кылгым келип жүрөт”, - деп жазды ырчы кыз.

Эске сала кетсек, ырчы өткөн жылдын жай айында авто кырсыкка кабылып, бир нече жолу оор операцияны башынан өткөргөн. Бир жылдан бери ден соолугун калыбына келтирүү менен алек болуп келген ырчы, чыгармачылыгына да азырынча кайта элек.