Шумдук! Бишкектик жигиттер жасалма кирпик жасаткан сүрөт тарады

"Сулуулук курмандыкты талап кылат" дегендей бүгүнкү күндө көпчүлүк кыздар сулуу болуу үчүн ар кандай курмандыктарга барып келет. Бирок акыркы учурларда кыздардан кем калышпай эркек балдардын да сулуу болууга аракет кылганы байма-бай кездешип келет. Бишкектин сулуулук салондорунун биринде эркек балдарга жасалма кирпик улаган сүрөт пайда болду. Бул сүрөт аталган сулуулук салонунун Instagramдагы жеке баракчасына жүктөлгөн.

Салондун жумушчуларынын бирине Barometr.kg сайтынан тактоо иретинде байланышканыбызда:

"Кызматтар кыздарга же балдарга деп бөлүнбөйт. Кардар келсе жасап бере беребиз. Балдар кирпик жасаткан учурлар көп эле кездешет, болгону ким интернетке чыгарууга уруксат берсе ошолорду гана чыгарабыз. Сүрөттөгү эки жигит өздөрү макул болгон үчүн чыгарганбыз." -деген жооп алдык.

Ал эми сүрөттүн астына пикир калтыргандардын басымдуу бөлүгү "бул эмнеси?" деп таң калгандарын жашыра алышкан жок. Постто жеке баракчанын авторлору терс пикирлерди өчүрүп салуусун эскертип баяндама жазган.