«Семетей» обсервациясында 600дөй адам дарыланууда (Сүрөт)

«Семетей» обсервациясында 600дөн ашуун оорулуулар дарыланып жатат. Бул тууралуу Өкмөттүн маалыма кызматына таянып "Барометр" билдирет. 

«Семетей» обсервациясындагы реанимацияда түзүлгөн шарттар адам өмүрлөрүн сактоого көмөк берет. Мындай ишенимди Кубатбек Боронов «Семетей» обсервациясынын иши менен таанышып, көчмө жыйын өткөргөн учурда билдирди.

 «Бүгүнкү күндө коронавируска шектелген оорулууларды кабыл алып жаткан көптөгөн медициналык мекемелер өнөкөт оорусу бар бейтаптарды кабыл ала алышпайт. Учурда дал ушул «Семетей» обсервациясында көптөгөн сандагы, башкача айтканда, 600 ашуун  оорулуулар дарыланууда. Ошондуктан обсервациянын аймагында реанимация бөлүмү уюштурулган. Мында Бишкек шаарынан жана Чүй облусунан да оорулууларды алып келүүдө», - деди Боронов.

 Башкы реаниматолог Жамиля Чынгышова маалымдагандай, учурда реанимацияда 50 адамга эсептелген орун бар.

 «40 жакын врач-реаниматологдор, ошондой эле клиникалык ординаторлор 4 сменада иш алып барууда. Реанимациялык блок бардык зарыл жабдуу менен жабдылган. Оорулууларды кычкылтек менен камсыздоо үчүн мында суюк кычкылтек концентраторлору жана өпкөнү дем алдыруучу аппараттар орнотулган. Реанимацияга дарты оорлошкон бейтаптар жаткырылгандыктан, жоготуулар да орун алууда. Медициналык кызматкерлер адам өмүрлөрүн сактоого колдон келген күч-аракетин жумшап жатат», - деп белгиледи реаниматолог Чынгышова.  

 Өкмөт башчы зарыл болгон учурда кошумча күч тартылаарын баса белгиледи.