Коронавирустун курч мүнөздө өтүшү ар бир өлкөдө ар түрдүү созулган

Кыргызстан эпидемиянын курчуган мезгилинен бат чыгып кете алды. Бул тууралуу өкмөт башчы Кубатбек Бороновдун брифинг учурунда берген маалыматына таянып "Барометр" билдирет.

 "Январь айынан бери президентибиз башында туруп, өкмөт эпидемиологиялык жана экономикалык абалды – туруктуу кармап туруунун үстүндө колубуздан келишинче аракет жасадык", -  деп билдирди  КР Премьер-министри Кубатбек Боронов.

Өкмөт башчынын айтымында, 19-мартта Кыргызстанда алгачкы 3 адамдан вирус чыккан кезде, дүйнөдө 169 мамлекетте вирус катталган болчу. Демек, аягына чейин вирусту өлкөгө киргизбегенге мүмкүн болушунча аракет жасалды.

 “Кээ бир мамлекеттерде вирус катталгандан кийин 15 күндүн ичинде эле жогорку пикке чыга түшкөнүн көрдүк. Кыргызстанда бул учур июнь айынын аягы – июлдун башында жетти. Демек, ага чейин, катуу кыйналганыбызга карабастан, өзгөчө абал, өзгөчө кырдаал сыяктуу карантиндик режимди киргизүү менен оорунун тез жайылышына жол берилген жок, - деп белгиледи Боронов.

Оорунун курч мүнөздө өтүшү ар бир өлкөдө ар түрдүү созулган:

-  Кытайда пандемиянын күчөгөн учуру январь, февраль, март, апрель айларына туш келди, же 85 күнгө чейин созулган.

- Европада март, апрель, май айларына – 100 күнгө чейин созулду.

-  Америкада вирус апрель айынан бери басылбай жатат. Оорунун жогорку чеги деген мезгил Америка Кошмо Штаттарында 5 айга созулганын көрүп жатабыз.

-  Кыргызстандын өкмөтү – президентибиз, коомчулук менен биргеликте ыкчам кескин чараларды кабыл алып, эпидемиянын курчуган мезгилинен аз убакытта – 3 жуманын ичинде чыгып кете алдык.

Ошол эле учурда өкмөттөн жаз-күз мезгилинде каптоочу сасык тумоодон алдын алуу үчүн 21-августта гриппке каршы вакцина сатып алуу максатында 221,5 млн сомго буйрук чыгарылды. Бул каражатка 700 миң доза вакцина сатылып алынат. Биринчи кезекте балдар, мугалимдер, калктын аярлуу катмарлары жана дарыгерлер эмделет.