Россиядан сатып алынган буудайдын экинчи партиясы Кыргызстанга келди

Россиядан сатып алынган буудайдын экинчи партиясы Кыргызстанга алып келинди. Бул тууралуу өкмөттүн аппаратынын маалыматтык камсыздоо бөлүмү билдирди. 

Бул жолу 11 вагон – 760 тонна дан алынып келинди. Жакынкы күндөрү дагы 53 вагон буудай жеткирилет. 

Белгилей кетсек, буга чейин Мамлекеттик материалдык резервдер фонду Россиядагы азык-түлүк корпорациясы менен 33 миң тонна буудай сатып алуу боюнча келишимге кол койгон. Бүгүнкү күндө анын 1800 тоннага жакыны келди. 

КР өкмөтү тарабынан азык-түлүк коопсуздугун камсыз кылуу максатында сатып алынган буудайдын курамындагы белоктун көрсөткүчү жогору. 

Мамлекеттик материалдык резервдер фондунун кампаларында ун менен буудайдын кору жетиштүү. Өлкөдө ун жана дан азыктарына болгон таңкыстык жок.