Жол эрежеси боюнча айыппулдун өлчөмүн 100 миң сомго чейин көтөрүүнү сунушташууда

Жогорку Кеңеште айрым коркунучтуу делип эсептелген жол эрежесин бузууларга айыппулду жогорулатууну сунушташууда. Бул тууралуу «Өнүгүү-Прогресс» фракциясынын отурумунда Бакыт Төрөбаев билдирди. Анын айтуусунда фракция жолдордогу кооптуу абалдарды жөнгө салуу үчүн Бузуулар жөнүндө кодекске өзгөртүүлөрдү киргизүүнү сунуштайт. 

«Биз айыппулдардын көлөмүн азайтууга макул эмеспис. Биз жол эрежесин бузгандыгы үчүн жазалоо шарттарын күчөтүүнү сунуштайбыз», — дейт эл өкүлү. Фракция 9- жана 10-категориядагы коомго коркунуч келтирген эреже бузуулар үчүн кодекске өзгөртүү киргизүүнү сунуштоодо.  

Алсак, 9-категорияда физикалык жактар үчүн айыппулдар 500 эсептик көрсөткүчтү түзөт (50 миң сом), юридикалык жактарга — 750 эсептик көрсөткүч (75 миң сом). 10-категорияда физикалык жактарга — 1 000 эсептик көрсөткүч (100 миң сом), юридикалык жактарга — 1 миң 500 эсептик көрсөткүч каралган.

Долбоордо жасалма мамлекеттик номер үчүн айыппул 10 миң сомдон 100 миң сомго чейин, юридикалык жактарга — 150 миң сомго чейин. Автобейбаштык үчүн 4-категория боюнча эмес, 9-категория боюнча айыппул салуу каралган: физикалык жактарга — 50 миң сом, юридикалык жактарга — 75 миң сом.

Ошондой эле мас абалында, банги заттарынын же башка психотроптук заттардын таасири алдында автоунаа башкарып баратып кармалуулар кайталанган учурларда мүлкүн конфискациялоо менен жазага тартуу дагы сунушталууда.