Кыргызстанда жыл башынан бери 60тан ашык наристе жол кырсыгынан каза болгон

Кыргызстанда жыл башынан бери балдар катышкан 1 300дөн ашык жол кырсыгы катталды. Бул тууралуу Жол кыймылынын коопсуздугун камсыздоо башкы башкармалыгынан билдирди.

Тилекке каршы, анын кесепетинен 60тан ашык наристе каза болуп, 1 600дөн ашык бала жаракат алды.

Мындай көрүнүштү болтурбоо жана алдын алуу иштерин жүргүзүү үчүн Жол кыймылынын коопсуздугун камсыздоо башкы башкармалыгынын кызматкерлери өлкө боюнча 2000дөн ашык мектепке бекитилип, балдардын жолдогу коопсуздугун камсыз кылуу үчүн күчөтүлгөн тартипте кызмат өтөп жатышат. 

Жолго жакын жайгашкан мектептердин айланасындагы жолдор каралып чыгып, жол белгилери жана жол чийиндери толук түрдө кароодон өткөрүлдү.

ЖККК кызматкерлеринен сырткары эң негизги жоопкерчилик ата-эне менен коомдун колунда.

"Ата-энелерге кайрылабыз:

• Балдарыңызга жол эрежелерин түшүндүрүп туруңуздар.

• Жолдо телефонго алаксыбай, балдарды колго кармап өтүңүздөр.

• Автоунаа айдап баратканда балдарды ар дайым коопсуздук куру менен бекитиңиздер.

 Айдоочуларга кайрылабыз:

• Мектептердин жанында, турак жайларда ылдамдыкты азайтыңыздар.

• Балдардын жолдо алдын ала күтүүсүз чыгып калышы мүмкүн экенин унутпаңыздар.

• Бир гана секундалык кайдыгерлик чоң трагедияга алып келиши мүмкүн.

Балдарыбыздын коопсуздугу — баарыбыздын колубузда!", - деп айтылат маалыматта.