УКМКнын Тогузунчу кызматынын экс-начальниги Дамир Мусакеев суракка чакырылды

УКМКнын Тогузунчу кызматынын экс-начальниги Дамир Мусакеев Аскер прокуратурасына суракка чакырылгандыгын КСДП төрагасынын орун басары Кундуз Жолдубаева билдирди.

Анын айтуусунда, Мусакеев бүгүн 15-00дө күбө катары келүүгө тийиш болгон чакыруу кагазын алган. 

Аскер прокуратурасы буга чейин мыйзамсыз баюу  боюнча иш козгогон. Тагыраагы, УКМКнын Тогузунчу кызматынын экс-начальниги Дамир Мусакеевдин мүлкүнө байланыштуу. Тергөөнүн маалыматы боюнча  2010-жылдан 2017-жылга чейин ал 20 миллион сомдук турак-жайга ээ болгон.

Дамир Мусакеевди кызмат абалынан пайдаланган деп да айыпташууда. Тергөө ал 2016-жылдан 2017-жылга чейин УКМКнын Тогузунчу кызматынын начальниги болуп иштеген учурда кызматкерлердин өзүнө жакындарына батирлерди мыйзамсыз бөлүштүргөндүгү тууралуу белгилейт.