ТЭЦтеги аварияга күнөөлүүлөр келтирилген зыян үчүн 11 миллион сом төлөйт

Кечээ, 19-апрелде Биринчи май райондук соту Бишкек ТЭЦинде болгон авария боюнча кылмыш ишине чечим чыгарды.

Айыпталып жаткандар соттун өкүмүнө ылайык “Электр станциясы” ачык акционердик коомунун доосуна 8 миллион сом көлөмүндө компенсация жана айып пул төлөйт. Ошондой эле “Бишкек жылуулук түйүндөрү” ачык акционердик коомуна 3 миллион сом берүүлөрү зарыл. Тактап айтканда соттолгондор баш-аягы мамлекетке 11 миллион сомдук зыяндын ордун толукташмакчы.

Соттун өкүмү чыгып жана айып пул төлөй турган мурдагы-топ-менеджерлердин тизмеси:

Улуттук энерго холдингдин экс-башчысы Айбек Калиев 2 жыл 6 айга эркинен ажыратылды жана 100 миң сом айып салынды.

“Электр станциялары” ачык акционердик коомунун экс-башкы директору Узак Кыдырбаев 4 жылга эркинен ажыратылып, 150 миң сом айып салынды.

Улуттук энерго холдингдин төрагасынын орун басары Нурлан Садыков 2 жыл 6 айга эркинен ажыратылды жана 100 миң сом айып салынды.

“Электр станциялары” ачык акционердик коомунун экс-орун басары Бердибек Боркоев 8 жыл эркинен ажыратылды жана 150 миң сом айып тагылды.

ТЭЦти модернизациялоо боюнча долбоордун аткаруучу директору Темирлан Бримкулов 2 жыл 6 айга эркинен ажыратылды жана 100 миң сом айып салынды.

ТЭЦтин экс-директору Нурлан Өмуркул уулу 4 жыл абакка кесилди жана 150 миң сом мамлекетке айып пул төлөмөй болду.

Мурдагы техникалык директор Нургазы Курманбеков 4 жылга эркинен ажыратылып, 150 миң сом айып төлөмөй болду.