Шашылыш билдирүү: Кыргызстанда нөшөрлөгөн жамгыр жаашы күтүлүүдө

1-июндан 5-июнга чейин Кыргызстанда туруксуз аба ырайы күтүлөт. Бул туурасында  Өзгөчө кырдаалдар министрлиги маалымат таратты.

Аталган мекеменин маалыматына караганда 1-июнда тоолуу жана тоо этектериндеги райондордо, 2-3-июнда Кыргызстандын көп бөлүгүндө, 4-5-июнда айрым райондордо жамгыр, чагылган түшүп, тоолуу райондордо кар жаайт.

Чүй областынын тоолуу жана тоо этектериндеги райондорунда, Ош, Жалал-Абад, Баткен областынын айрым райондорунда жана Ысык-Көл өрөөнүнүн чыгышында катуу жаан жаайт. Тоо этектеринде жана тоолуу райондордо мөндүр күтүлөт.

1-2-июнда айрым райондордо ылдамдыгы секундасына 17-22 метр жеткен шамал болот.

Мындай туруксуз аба ырайы айыл чарба иштерин жүргүзүүдө, жайыттагы малдарга терс таасирин тийгизет. Автотранспорттордун жүрүшүн, байланыш ишканаларынын, энергетикалык жана коммуналдык кызматтардан ишине кыйынчылык жаратат. 

2-5-июнга чейин нөшөрлөгөн жамгырдан улам өлкөнүн тоо этектериндеги жана тоолуу райондорунда сел жүрүшү мүмкүн.