Ангела Меркель Навальный Новичок тобунун уусу менен ууланган деди. Буга Орусиянын жообу

 Германиянын “Шарите” клиникасында комада жаткан орусиялык оппозициянын лидери Алексей Навальный “Новичок” тобунун нервге доо кетирген дарысы менен ууланганын жарыялады. Натыйжада, анын денесинде химиялык зат бар экендиги жөнүндө түздөн-түз далилдер алынды. Бул тууралуу Lenta.ru агенттиги берген маалыматка таянып “Барометр” которду.

Мындай тыянакты мамлекеттик эксперттер дарыгерлердин уруксаты менен жүргүзгөн анализдин жыйынтыгын изилдеп чыккандан кийин жасашты.

Германия, маалыматтарды алгандан кийин, Россиянын элчисин Тышкы иштер министрлигине чакырды. Жолугушууда дипломатка толук иликтөө жүргүзүү керектиги айтылды. Тышкы иштер министри Хейко Маас орус бийлигин Навальныйдын "ууландырылышына" күнөөлүүлөрдү таап жазалоого чакырды. Анын пикиринде, эми Москва коңшулары менен жакшы мамиледе болууга кызыкдар болушу керек.

Германия ЕС жана НАТОдогу өнөктөштөрүнө окуянын чоо-жайы жөнүндө маалымат берүүнү көздөп жатат жана алар менен биргеликте Москвага кандай чара колдонуларын иштеп чыгышат. Санкцияларды кабыл алуу чечими Москванын кандай чечим чыгарарынан көз каранды экени белгиленди.

 Ага утурлай эле, Ангела Меркель Алексей Навальныйдын абалынын начарлашынын себептерин изилдөөгө жардам берген аскердик токсикологдордун изилдөөлөрүнүн натыйжалары күмөнсүз экендигин билдирди. Навальный чындап эле Новичок тобунун уусу менен уулангандыгын айтты. Анын айтымында, зат "өткөрүлгөн тесттердин жүрүшүндө өзгөчө аныкталган".

Канцлер алар "Навальныйдын оозун жабууну каалашкан" деп эсептейт, ошондуктан ал окуяны адам өлтүрүүгө аракет катары баалап жатат.

 "Бул коркунучтуу маалымат ууландыруучу зат менен орусиялык оппозиционерди өлтүрүү аракетине ишарат кылат", - деди Меркел.

Россия Берлиндин билдирүүлөрүндө эч кандай ишенимдүү далилдерди көргөн жок.

Россиянын Тышкы иштер министрлиги орусиялыктын "Новичок" тобунун уусу менен "ууланышы" боюнча билдирүүлөр фактылар менен тастыкталбай тургандыгын баса белгиледи.

"Эгерде биз талап кылып жаткан медициналык уюмдардын катышуусунда, укук коргоо органдары тарабынан кылдат иликтөө болсо, анда биз өнөктөштөрүбүздү эки тараптуу укуктук механизмдерди колдонуп, толук кызматташууга жана маалымат алмашууга чакырабыз", - деп баса белгиледи Тышкы иштер министрлиги.

2-сентябрдагы "Шарите" ооруканасынын маалыматы боюнча, Алексей Навальныйдын ден-соолугунун абалы дагы деле болсо оор экени айтылды. Болуп өткөн окуя, айрыкча нерв системасынын узак мөөнөттүү кесепеттерин жокко чыгарууга болбойт деп өзүнчө баса белгиленет.

Ошол эле учурда орусиялык соттук-медициналык эксперттер Навальныйдын денесинде уулуу заттарды таппагандыгы кабарланууда. Ага коюлган негизги диагноз углевод метаболизминин бузулушу, ал эми коштомо панкреатит. Россиянын укук коргоо органдарындагы маалымат булагы Навальныйдын анализдерин бир эле учурда бир нече лабораториялардын эксперттери текшергенин тактады.