Бишкекте коомдук транспорттогу коопсуздук боюнча брифинг өттү

Кечээ, мэриянын жыйындар залында шаардык коомдук транспорт өзгөчө кырдаал шарттарында иштөөсү боюнча онлайн-брифинг өткөрүлдү. Бул тууралуу мериянын басма сөз кызматына таянып "Барометр" билдирет.

Жолдордогу абал боюнча Шаардык транспорт башкармалыгынын башчысы Сатыбалды Хакимов, Бишкек троллейбус башкармалыгынын башчысы Артур Өмүрзаков,  BPC KG компаниясынын директору Тимур Саадабаев жана «Тулпар» долбоорунун адиси Бекжан Акматбеков айтып берди.

Мамлекеттик-жеке өнөктөштүк долбоорунун алкагында шаардык мэрия Швецариянын BPC компаниясы менен биргеликте «Тулпар» долбоорун ишке ашырууда. 27-августка карата шаардыктар  «Тулпардын» 100 миңдей стандарттык көк, 38 миң жеңилдетилген кызыл жана 6 миң 175 окуучулар үчүн жашыл карталарды алышты. Дагы сатыкка 90 миң көк, 50 миң кызыл жана 60 миң жашыл карта даярдалды.

Ата-энелер жеке мектептерде окуган окуучулар карталарды кантип алышат деген суроолор менен кайрылышты. «Тулпар» долбоорунун адиси Бекжан Акматбеков жашыл карталарды алуу үчүн мектеп директору расмий кат менен окуучулардын тизмесин «Тулпар» компаниясына жиберүү керектигин билдирди.

Шаардык транспорт башкармалыгынын башчысы С.Хакимов азыркы учурда башкармалык ден соолугунан мүмкүнчүлүгү чектелген жүргүнчүлөргө шарттарды түзүү иштерин баштагандыгын жана транспорттук каражаттарды сатып алууда транспорттордун кириштеринде жапыз пандустары бар, өзгөчө жүргүнчүлөр үчүн орундардын болушуна өзгөчө көңүл буруп жаткандыгын белгиледи.

Шаардык троллейбус башкармалыгынын башчысы Артур Өмүрзаков 140 троллейбустун 115 троллейбусу пандустар менен камсыздалгандыгын билдирди. Азыркы учурда айдоочулар ден соолугунан мүмкүнчүлүгү чектелгендер менен иштөө боюнча окууларга катышып, өзгөчө шаар тургундарына жардам беришүүдө.

Эскерте кетсек, шаардык транспорт (автобус, троллейбус жана кичи маршруттар)  дем алыш жана майрам күндөрү да иштеп баштады. Иш убактысы саат 7:00дөн 11:00го чейин жана 14:00дөн 23:00гө чейин. Саат 11:00дөн 14:00гө чейин санитардык тыныгуу. Бул учурда транспорттордун ичи тазаланып, дезинфекцияланат.