Мамлекеттик бажы кызматынын төрагасы: Товарлардын чек арадан өтүү мөөнөтү кыскарды

Мамлекеттик бажы кызматынын Борбордук аппаратында Кыргызстандын Эгемендүүлүгүнүн 34 жылдыгына арналган салтанаттуу жыйын болуп өттү.

Иш-чарага бажы кызматынын жетекчилиги, ардагерлери жана өздүк курамы катышты.

Мамлекеттик бажы кызматынын төрагасы Алмаз Салиев куттуктоо сөзүн сүйлөп, эгемендүүлүк улуттук сыймыктын, күчтүн жана келечекке болгон ишенимдин символу экенин белгиледи.

"Эгемендүүлүккө ээ болгондон бери Кыргызстан ар тараптан өзгөрүп, өзүнүн эл аралык аброюн жана экономикасын чыңады. Мамлекеттин кызыкчылыгын коргоп, анын экономикалык коопсуздугун камсыздаган бажы кызматынын ишмердүүлүгү өлкөнүн өнүгүшүндө маанилүү роль ойнойт", - деп белгиледи Мамлекеттик бажы кызматынын жетекчиси.

Салиев жетишилген натыйжаларга токтолду, атап айтканда, бажы төлөмдөрүнүн көлөмү өстү, товарлардын мамлекеттик чек арадан өтүү мөөнөтү кыскарды, тышкы экономикалык ишмердүүлүктүн катышуучуларына жагымдуу шарттар түзүлдү.

 Майрамдын урматына карата бир катар кызматкерлерге атайын наамдар жана ведомстволук сыйлыктар тапшырылды.

Өз сөзүнүн соңунда, Алмаз Салиев жалпы жамаатка чың ден соолук, кесиптик ийгиликтерди жана Кыргыз Республикасынын өсүп-өнүгүшүнө кошкон салымы үчүн жаңы жетишкендиктерди каалады.