Күлкүлүү видео. Тайсондун күйөрманы сыналгы аркылуу желдетип, терин аарчып турган

Лос-Анджелесде 28-ноябрда көпчүлүктүн бүйүрүн кызыткан легендарлуу Майк Тайсон менен Рой Джонстун беттеши болду. Интернет айдыңында спорттун дөө-шааларынын мелдеши тууралуу кызыктуу видео тасмалар, ашынган күйөрмандарынын кылыктары көпчүлүккө жылмаюу тартуулады. "Барометр" интернеттен алынган кызыктуу видео тасма менен бөлүшөт.

Соцтармак колдонуучусу беттеш болуп жаткан учурда Майк Тайсонго сыналгы аркылуу дем берип, желдедип, терин аарчып турган. Тайсон менен Джонс рингге чыккандан баштап, мелдеш аяктаганча сыналгынын алдында тикесинен тик туруп, тердесе кошо тердеп, кумирин сүрөп турган.

Бул видео тасманы интернет колдонуучулары жылмаюу менен кабыл алып “Тайсондун чыныгы күйөрманы” деп баалады.

Эскерте кетсек, 28-ноябрда спорттун легендалары, оор салмактагы мурдагы дүйнө чемпиону Майк Тайсон жана беш салмак категориясы боюнча дүйнөнүн экс-чемпиону Рой Джонс рингге чыгышкан. Беттеш сегиз раундга чейин созулуп, жыйынтыгында эки спортчу тең чыкты деген тыянак менен аяктаган.

Белгилей кетсек, Тайсон да, Джонс да рингге карьерасын жыйынтыктагандан кийин биринчи жолу чыгып жатышат.  Майк Тайсон 2005-жылдан бери, ал эми Рой Жонс 2018-жылдан бери беттешке чыга элек болчу.