Маданият, искусство жана билим берүү мекемелеринин айлыгы көтөрүлдү

Бир катар маданият, искусство жана билим берүү мекемелеринин кызматкерлеринин айлык эмгек акы өлчөмү 80%га көтөрүлдү. Бул тууралуу өкмөттүн мааылмат кызматы билдирди.

Маалым болгондой, тиешелүү токтомго премьер-министр Мухаммедкалый Абылгазиев кол койду.

Бул чечим маданият, искусство жана билим берүү мекемелеринин кызматкерлерине эмгек акы төлөөнүн шарттарын жакшыртуу максатында кабыл алынды.

Буга байланыштуу КРнын Өкмөтүнүн 2011-жылдын 19-январындагы № 16 «Маданият, искусство жана маалымат мекемелеринин кызматкерлерине эмгек акы төлөөнүн жаңы системасын киргизүү жөнүндө» токтомуна маданият мекемелеринин кызматкерлеринин маяналарынын өлчөмдөрүн аныктоодо колдонулуучу кызматтык маяналарга эселик коэффициент 1,8 өлчөмүндө белгилөө каралган өзгөртүүлөр киргизилди:

- Т.Абдумомунов атындагы Кыргыз улуттук академиялык драма театрынын;

- Ч.Айтматов атындагы Кыргыз Республикасынын мамлекеттик улуттук орус драма театрынын;

- С.Ибраимов атындагы Ош улуттук драма театрынын, Кыргыз Республикасынын улуттук тарых музейинин;

- Кыргыз Республикасынын Улуттук тарых музейинин;

- Г.Айтиев атындагы Кыргыз улуттук керкем сурет искусство музейинин;

- «Сулайман-Тоо» улуттук тарыхый-археологиялык музей комплексинин;

- Кыргыз Республикасынын Маданият, маалымат жана туризм министрлигинин алдындагы Кинематография департаментине караштуу Т.Океев атындагы «Кыргызфильм» улуттук киностудиясынын.

Мындан тышкары, төмөнкү мекемелердин профессордук-окутуучулук курамынын, концертмейстеринин жана иллюстраторлорунун кызматтык маяналарынын өлчөмү 80%га көбөйтүлдү:

- Ч.Базарбаев атындагы Бишкек хореографиялык окуу жайынын;

- М.Күрөңкеев атындагы Кыргыз мамлекеттик музыкалык окуу жайынын;

- С.А.Чуйков атындагы Кыргыз мамлекеттик керкем сурет окуу жайынын;

- Ниязалы атындагы Ош мамлекеттик музыкалык окуу жайы.

Белгилей кетсек, өкмөт башчы буга чейин үй бүлөлүк дарыгерлердин да айлыгы жогорулай тургандыгын айткан.