Кыргызстандык компаниялар AliExpress платформасында соода кылышат

Экономика жана каржы министринин биринчи орун басары Данияр Иманалиев Globalization Office of Alibaba Group компаниясынын өкүлдөрү менен жолугушту. Бул тууралуу аталган ведомствонун басма сөз кызматынан кабарлашканын “Барометр” билдирет.

Тараптар электрондук коммерция тармагында биргелешкен кызматташтыктын актуалдуу маселелери боюнча пикир алышты. Негизинен Alibaba жана AliExpress платформаларында ата мекендик продукцияларды сатуу тууралуу сөз болду. Ошондой эле Кыргызстанда товарды кайра бөлүштүрө турган борборду ачуу тууралуу талкууланды.

Экономика жана каржы министрлиги, КРдагы электрондук коммерция ассоциациясы жана Alibaba Group компаниясынын ортосунда кызматташтык жөнүндө меморандумду иштеп чыгууга макулдашылды.