Кыргызстандагы Кытай ишкерлеринин ассоциациясы калктын аярлуу катмарына жардам берди

Кыргызстандагы Кытай ишкерлеринин ассоциациясы аз камсыз болгон үй-бүлөлөргө гуманитардык жардам берди. Аны кабыл алуу иш-чарасына Кыргыз Республикасынын Өкмөтүнүн Аппарат жетекчиси-министр Самат Кылжыев, ошондой эле Кыргызстандагы Кытай Эл Республикасынын элчилигинин кызматкерлери катышты. Бул тууралуу Өкмөтүнүн Аппаратынын маалыматтык камсыздоо бөлүмү билдирди. 

Самат Кылжыев Өкмөттүн атынан ыраазычылык билдирди.

Кыргызстандагы Кытай ишкерлеринин ассоциациясы 50 килограммдык 550 кап ун, 5,5 тонна шекер жана 5 500 литр суу май берди. Азык-түлүк муктаж жарандарга таратуу үчүн Жардам штабына өткөрүп берилди.

Бул гуманитардык жардам Бишкек, Ош жана Жалал-Абад шаарларында калктын аярлуу катмарына таркатылат.

Белгилей кетсек, Кыргызстанда ишмердүүлүгүн жүргүзүп жаткан Кытай Эл Республикасынын жарандары буга чейин Бишкек, Ош жана Жалал-Абад шаарларындагы ооруканаларда иштеп жаткан медицина кызматкерлерине 600 даана коргоочу кийим берген.