“Күтүп жатат Эр Манастын балдары”. Акындар Казакстандын көк бөрү боюнча командасына чакырык салды

Кыргыз акындары Казакстандын көк бөрүчүлөрүн мелдешке чакырып ыр арнады. Бул тууралуу “Барометр” билдирет.

Акындар Нурсултан Малдыбаев, Арген Биймырза уулу жана Азамат Асанбеков 13-августта боло турган Чолпон-Ата шаарында көк бөрү боюнча клубдар аралык дүйнө чемпионатына казак командасына чыкырык салышты. 

“Казакстан тургундары аманбы?

Көк бөрүгө командаңар даярбы?

Кулак салгын ага-ини,

Келип калдык атайын, 

Жеткирип биз баурларга кабарды.

Он үчүндө Ысык-Көлдүн жээгинде,

Оюн болот Кыргызстан элинде.

Президент да катышат,

Даярданып жатышат,

Биз күтөбүз казактарды Көлүмдө.

Казак-кыргыз тартышат деп көк бөрү, 

Карап турат дүйнө элинин көптөрү.

Эң алдыңкы команда, 

Жантартышат аларга,

Келсе экен деп намыстанып өздөрү.

Из калтырып, келечекке, тарыхка,

Жараса экен казак-кыргыз намыска,

Казактарды күтөбүз,

Инибиз да үкөбүз, 

Жигиттерче түшсө экен деп жарышка.

Казакстанга келип калдык шашылып, 

Казактарды көк бөрүгө чакырып.

Чамдангыла казактар,

Силерле да атак бар,

Ала-Тоого аттангыла ашыгып.

Желбиресин байрагы, 

Казактарым жайдары,

Күтүп жатат эр Манастын балдары!”, -деп ыр менен чакырык салышты акындар.

Белгилей кетсек, буга чейин, бир нече жолку оюундарга Казакстандын көк бөрү боюнча командалары келбей коюшкан.

Чолпон-Ата шаарында көк бөрү боюнча дүйнө чемпионаты өтөт. 

Мелдеш үч форматта болот. Ага 8 өлкөдөн келген 12 команда катышат.

• Кыргызстан менен Казакстандын алдыңкы 4 командасы;
• Дүнөлүк 12 клуб арасында;
• Кыргызстан менен Казакстандын 45 жаштан жогорку оюнчуларынан турган командалар арасында мелдеш болот.

Катышуучулар:

• АКШ;
• Казакстан;
• Өзбекстан;
• Венгрия;
• Tүркия;
• Монголия;
• Россия;
• Кыргызстан.

Турнир 13-августтан 20-августка чейин өтөт.