"Үйдө жалгыз болгон". Бишкекте 3-кабаттан кулап кеткен бала тууралуу окуянын чоо-жайы

Бишкекте көп кабаттуу үйдүн 3-кабатынан кулап кеткен бала окуя болгон учурда үйдө жалгыз болгон. Бул тууралуу Ленин РИИБнин маалымат кызматына шилтеме берип “Барометр” билдирет.

Маалым болгондой, милицияга бүгүн, 2-апрелде саат 10:42 билдирүү келип түшкөн.

“Айтылган дарекке Ленин РИИБинин кызматкерлери барганда 2015-жылы туулган бала көп кабаттуу үйдүн 3-кабатынан кулап кеткени аныкталган. Кырсык болгон жерге келген "Тез жардам" кызматы балага биринчи медициналык жардам көрсөтүп, андан соң №3 шаардык балдар ооруканасына жеткиришти.

Ал эми, окуя болгон учурда, бала үйдө жалгыз болгон. Учурда тергөө иштери жүрүп жатат", - деп айтылат маалыматта.

Бул факты Кылмыштардын жана жоруктардын бирдиктүү реестрине, 150-берене "коркунучта калтыруу" боюнча катталып, сотко чейинки өндүрүшкө алынган.

Эске сала кетсек, буга чейин, Бишкек шаарынын Токтогул көчөсүндө жайгашкан көп кабаттуу үйдүн 3-кабатынан 6 жашар бала кулап кеткени тууралуу жазганбыз. Дарыгерлер балага баш мээнин чайкалышы жана ичтин жабык жабыркашы деген диагноз коюшкан. Дарыгерлердин айтымында, учурда баланын акыбалы туруктуу жана анын эч жери сынган эмес.