ИИМге 2 жеңил унаа жана 3 кичи автобус тапшырылды (Сүрөт)

Ички иштер министрлигине ЕККУнун Бишкектеги Программалык кеңсеси тарабынан автоунааларды жана башка жабдыктар тапшырылды. Бул тууралуу ИИМдин басма сөз кызматына таянып "Барометр" билдирет. 

Бүгүн, 5-августта Бишкек шаарында ИИМге ЕККУнун Бишкектеги Программалык кеңсеси тарабынан автоунааларды жана башка жабдыктарды тапшыруу аземи болуп өттү. ИИМ жаңы заманбап атайындаштырылган автоунааларга ээ болду. Аталган иш-чарага  милициянын полковниги Алмаз Орозалиев, ЕККУнун Бишкектеги Программалык кеңсесинин кеңешчиси Шамшыбек Мамыров катышты.

"Долбоордун алкагында тапшырылып жаткан кезектеги автоунаалар менен жабдыктар коомдук тартипти жана инсандын коопсуздугун сактоо, укук бузуулардын алдын алуу чөйрөсүндө пайдаланылып, натыйжалуу жана максаттуу түрдө кылмыштуулук менен күрөшүүгө шарт түзөт. Жыйынтыгында Алмаз Орозалиев ЕККУнун Бишкектеги Программалык кеңсеси менен мындан ары дагы тыгыз кызматташууга ниетин билдирип, иштерине жана  долбоорлорду ишке ашырууда ийгиликтерди каалап өттү", - деп айтылат маалыматта.

Ал эми, ЕККУнун Бишкектеги Программалык кеңсесинин башчысынын милдетин аткаруучу Сергей Слезнев укук коргоо ишмердүүлүгүн колдоо жана материалдык-техникалык базасын өнүктүрүү максатында аталган автоунаалар менен жабдыктар тапшырылгандыгын билдирди. Ошондой эле, бул багытта мындан ары дагы кызматташууну өнүктүрүүгө даяр экендигин белгиленди.

Ички иштер министрлигине “ГАЗ 3302-1450” үлгүсүндөгү эки автоунаа (кармалган адамдарды ташуу үчүн транспорттук каражат),  “Соболь Газ” үлгүсүндөгү үч кичи автобус (милициянын көчмө кабылдамасы) жана башка зарыл болгон жабдыктар тапшырылды. Жаңы автотранспорт каражаттар ИИОнун аймактык бөлүктөрүнө жөнөтүлүп, коомдук тартипти камсыздоо боюнча тапшырмаларды аткарууда натыйжалуулугун жогорулатууга мүмкүнчүлүк берет. Автотранспорттор заманбап жабдыктар менен камсыздалган. Алынган жардамдар коомдук тартипти камсыздоо жана кылмыштуулук менен күрөшүүгө багытталган ар кандай чечимдерди кабыл алууда ыкчамдуулукту жакшыртууга шарт түзөт.