Хирургдар жарды үй-бүлөлөрдө төрөлгөн эрини жырык жана таңдайы жок балдарга бекер операция жасашат

Ошентип, бишкектик стоматолог Васиф Раджов тарабынан башталган «жакшылык эстафетасы» уланды. Тагыраагы, Бишкекте аты таанымал Nova Clinic эстетикалык медициналык борборунун пластикалык хирургдары Максут Кадыров жана Руслан Ешходжаев жарды үй-бүлөлөрдө төрөлгөн эрини жырык жана таңдайы жок балдарга бекер операция жасашат.

 «Акциянын негизги «Жакшылык жасайлы!» деген максаты – эрини жырык жана таңдай жок балдардын жашоосун өзгөртүү. Акция ыйык Рамазан айынын урматына башталган, бирок муктаж болгондордун абдан көп болгондугунан бул акция узартылат. Мындай операцияга болгон суроо-талаптар абдан көп, андыктан биз кымбат турган мындай операцияга каражат таба албаган жакыр үй-бүлөлөргө жардам катары операцияны бекер кылууну чечтик. Адамдын бети анын өзүнө, ал тургай келечек жашоосуна болгон ишенимин  арттырат эмеспи. Биз дагы балдардын бактысыз болбой, жашоодо жеңил жана ишенимдүү өмүр сүрүүсү үчүн жардам бергибиз келет», - дейт борбордун маркетологу Салтанат Салкунбаева.