Египетте жана Таиландда белгисиз вирус жуктургандар көбөйүп, туристтерди сак болууга чакырууда

Египеттин Кена провинциясындагы Аль-Кус айылында белгисиз вирусту жуктурган 67 учур катталды. Бул тууралуу TheNational басылмасына таянуу менен “Барометр” билдирет.

Египеттин Саламаттыкты сактоо министрлиги өлкөнүн түштүгүндөгү айылдардын биринде 67 адам белгисиз вирус жуктуруп алгандан кийин анализдерди аныктоо жана дарылоо үчүн медициналык конвой жөнөттү.

ЖМКлардын маалыматына караганда, туристтер Луксорго бараткан жолдон өтүп бараткан Кена аймагында белгисиз оорунун учурлары катталган. 

Байыркы Египеттин атактуу эстеликтерине экскурсияга барган көптөгөн туристтер бул провинция аркылуу өтүү коркунучуна дуушар болушат. 
Кена Нил дарыясынын жээгинде Луксордун түндүгүндө жайгашкан жана Хургададан Луксорго автобус каттамы Кена аркылуу өтөт.

Акыркы бир нече жуманын ичинде Аль Кустун көптөгөн тургундары жергиликтүү саламаттыкты сактоо мекемелерине белгисиз вирустун симптомдору менен кайрылышкан.

Ооруну чиркейлер алып жүргөндүктөн, тургундардан суу булактарын жабуу жана андан ары текшерүүлөр жүргүзүлмөйүнчө курт-кумурскалардан сак болууну суранышты.   

Бүткүл дүйнөлүк саламаттыкты сактоо уюмунун маалыматы боюнча, бул вирусту жуктуруп алганда дене табынын көтөрүлүшү адатта 2 күндөн 7 күнгө чейин созулган.  Сасык тумоого окшош симптомдор менен коштолот.   
Биринчи симптомдор оорулуу чиркей чаккандан 4-10 күндөн кийин пайда болот.    

Жалпы симптомдорго баш оору, көздүн артынын оорушу, жүрөк айлануу жана кусуу, бездердин шишип кетиши жана муундардагы, сөөктөрдөгү же булчуңдардагы оору сыяктуу белгилер менен коштолгон жогорку температура кирет.    

Эске салсак, бул вирус тездик менен Түштүк-Чыгыш Азияда кеңири тарап жана Таиландда күч алууда.    
Акыркы маалыматтар боюнча, 2023-жылдын 7-июнуна карата катталган инфекциялардын саны өткөн жылга салыштырмалуу 500 пайызга көп. Буга байланыштуу Таиланд бийлиги туристтерди эс алууда сактык чараларын көрүүнү суранды.