Видео. Чүйдө түндө супермаркеттен кызды ала качып кетишти

Соцтармакта Аламүдүн районунун Лебединовка айылында кызды эки бала ала качып кетти делген видео жарыяланды. Маалыматты “Барометрге” Чүй ОИИБнин маалымат кызматынан тастыктады.

Маалым болгондой, окуя 5-майда түнкү саат он бирлер чамасында супермаркеттин алдында болгон.

Социалдык тармактарда тараган видеотасмада супермаркеттин алдына келип токтогон Toyota Estima үлүсүндөгү унаадан эки жигит түшкөнүн көрүүгө болот. Анан, жигиттер токтоп турган унаага келип, алардын бири айдоочу менен сүйлөшүп жатканда, экинчиси унаанын арткы орунтугунда олтурган кызды алып чыгып кеткен. Жигиттер кызды Toyota Estima үлүсүндөгү унаага салып алып кетип калганын видео тасмадан көрүүгө болот.

Окуядан бир-эки саат өткөндөн кийин уурдалган кыздын эжеси милицияга арыз менен кайрылган.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

"Иликтөө иш-чараларынын жүрүшүндө милиция кызматкерлери тарабынан жогорудагы кызды уурдап кеткен жарандын аты-жөнү такталган. Милиция кызматкерлери аталган жарандын жашаган жерине жөнөп кетишти. Кошумча маалымат берилет", - деп билдирди Чүй ОИИБдин маалымат кызматы.