Бишкекте коомдук транспортторго 775 миң сомго айып пул салынды

Муниципалитет  шаарды жана шаардыктарды санитардык нормаларды бузгандардан  коргоо боюнча ишин улантууда. Бул тууралуу Бишкек мэриясынын басма сөз кызматына таянып "Барометр" билдирет.

Шаардык транспорт башкармалыгынын, Троллейбус башкармалыгынын  жана Бишкек жүргүнчүлөр автотранспорттук ишканасынын кызматкерлери Мамлекеттик санитардык-эпидемиологиялык көзөмөлдөө борборунун, Транспорт жана жолдор министрлигинин алдындагы транспорттук инспекциясынын адистери менен  биргеликте коомдук транспорттордун салондорду күн сайын текшерип турушат.  Орундуктардын  санына жараша санитардык тазалык жана аралык сакталуусу, санитайзерлердин болуусу  милдеттүү.

18-ноябрга карата 5200гө жакын унаа санитардык текшерүүдөн өттү.

1-июндан тартып Мамлекеттик санитардык-эпидемиологиялык көзөмөлдөө борбору тарабынан айдоочулардын укук бузуулары боюнча Кодекстин 150-беренесине ылайык, 234 протокол түзүлүп,  239 миң сом айып пул салынды. Ошондой эле  9 жеке менчик ташуучу компаниянын башчыларына 293-берене боюнча протоколдор түзүлүп, айып пулдун суммасы 117 миң сомду түздү.

Бишкек шаары боюнча патрулдук милиция  жана Транспорт жана жолдор министрлиги тарабынан  419 миң 500 сомдук 157 протокол түзүлдү.

Транспорттук блок үчүн айып пулдардын жалпы суммасы 775,500 сомго жетти.