Баткенде дарыяга агып кеткен 10 жашар баланы 50гө жакын адам издеп жатат

Баткендин Исфайрам дарыясына 10 жаштагы бала агып кетти. Бул тууралуу ӨКМнын маалымат кызматына шилтеме берип "Барометр" маалымдайт.

Маалым болгондрй, кырсык кечээ, 12-июль күнү саат 20:40та Кадамжай районунун Майдан айыл өкмөтүнүн Кереге -Таш айылында болгон.

"Исфайрам дарыясына 10 жаштагы Т.А. аттуу бала агып кеткендиги тууралуу маалымат куткаруу кызматына келип түшкөн.

Куткаруу иштерине аймактагы №76 Өрткө каршы куткаруу бөлүгүнөн 4, №75 Өрткө каршы куткаруу бөлүгүнөн 8 куткаруучу тартылып, жергиликтүү эл менен биргеликте издөө иштерин жүргүзүшкөн.

Кеч киргендигине байланыштуу, издөө иштери бүгүн, 13-июль күнү саат 07:30да кайрадан улантылып, Кадамжай райондук Өзгөчө кырдаалдар бөлүмүнөн 14, Тоо кырсыгынан куткаруу кызматынан 7 куткаруучу жана Кадамжай райондук Ички иштер бөлүмүнөн 18 кызматкер, жергиликтүү элден 20 жаран тартылды", -деп айтылат маалыматта.