20 жаштагы жигитти ичке сайган Кеминдин тургуну кармалды

Кемин районундук ички иштер бөлүмүнүн кызматкерлери тарабынан жаш жигитке бычак сайган шектүү адам кармалды. Бул тууралуу Чүй областтык ички иштер башкы башкармалыгынан кабарлашты.  

11-апрелде Кемин районунун ички иштер бөлүмүнө аймактык ооруканага 19-20 жаштардагы жаш жигит бычактан жаракат алып түшкөнү тууралуу маалымат келген.

ИИБдин ыкчам-иликтөө тобу жабырлануучунун ким экенин тактады. Ал 20 жаштагы жергиликтүү тургун К. А. болуп чыкты.10-апрель күнү шериги менен чатакташа кетип аны ичке сайышкан.

Бул ишке шектүү делип Чүй областынын тургуну А. М. кармалды жана камакка алынды.

Тергөө уланууда.