Казакстанда жол кырсыгынан каза болгондордун сөөгүн алып келүүгө элчилик көмөктөшөт

Кыргызстандын Казакстандагы элчилиги ал жакта жол кырсыгынан каза болгон жарандардын сөөгүн мекенине алып келүүгө жардам берет. Бул тууралуу Тышкы иштер министрлигинин маалымат кызматы билдирди.

Эске салсак, Самара — Шымкент жолунда Lada-21070 үлгүсүндөгү автоунаада бараткан Кыргызстандын жарандары жол кырсыкка кабылып, айдоочу жана үч жүргүнчү каза болгон. Бир жаран ооруканага жеткирилген.

Тышкы иштер министрлиги каза болгон жарандардын тизмесин жарыялады. Алар: 1991-жылы туулган К.А., 1993-жылы туулган К.А., 1995-жылы туулган К.М., 2001-жылы туулган А.М. аттуу жарандар. Ошондой эле, ооруканага 1997-жылы туулган К.Г. аттуу киши жеткирилген.

Маркумдардын сөөгү Иргиз райондук ооруканасынын өлүкканасында.

Учурда Казакстандын тийиштүү органдары жол кырсыгынын чоо-жайын тактап жатат.

Каза болгон КР жарандарынын туугандарына кабар берилди.