Караколго бара жаткан унаанын четин кар көчкү басып калган. Ичиндегилер жабыркаган жок

Караколго бара жаткан унаа жолундагы ашууга кар көчкүсү түшүп, жолдо бара жаткан Нива унаасынын четин басып калган. Бул тууралуу ӨКМ маалымдады. 

Маалыматта айтылгандай, 19-январь күнү саат 22:00 чамасында Каракол-Эңилчек унаа жолунун 81-82-чакырым аралыгында (Чоң-Ашуу ашуусу) 2 жерге жалпы көлөмү болжол менен 7400 м3 кар көчкү түшкөн. Унаадагы 3 адам жабыркаган эмес жана алар жакынкы имараттардын бирине жайгаштырылган. 

Кырсык болгон жерге  Ак-Суу райондук Өрт-куткаруу бөлүмү тарабынан 2 бульдозер жиберилген. Унаа жолу 20-январь күнү саат 03:00дө бир тараптуу, ал эми саат 10:00дө толугу менен тазаланып ачылган.

Ал эми Нива унаасынын айдоочусу жана жүргүнчүлөрү жол ачылгандан кийин өздөрүнүн унаасы менен Каракол шаарына жетишкен.