Футбол: Бангладештин 6 жолку чемпиону “Дакка Абахани” Эдгар Бернхардтты командасына алды

Футбол боюнча Кыргызстандын улуттук курамасынын жарым коргоочусу Эдгар Бернхардт Бангладештин “Дакка Абахани” клубуна өттү. Бул тууралуу өлкөнүн футбол федерациясы кабарлады.

33 жаштагы футболчу келишим түзгөн жаңы клубунда 17-номердеги кийимчен ойнойт.

Улуттук курамдын жарым коргоочусу 2019-жылдагы сезондо Малайзиянын “Кедах” клубунда ойноду. Анда өлкөнүн футбол Ассоциациясынын Кубогун утуп, өлкө Кубогунун финалына жеткен.

Бернхардттын жаңы клубу “Дакка Абахани” Бангладештин 6 жолку чемпиону болгон. Өткөн жылы команда өлкө чемпионатында 2-орунда калды. 2019-жылы Кыргызстандын улуттук курамасынын дагы бир футболчусу Бахтияр Дүйшөбековдун “Башундара Кингс” клубу чемпион болгон.