Легендарлуу модельер Пьер Карден каза болду

Легендарлуу француз модельер Пьер Карден 98 жашында бул дүйнө менен кош айтышты. Бул тууралуу “Агентство Франс Пресс” агенттигинин твиттер баракчасына жарыяланган маалыматка шилтеме берип “Барометр” билдирет.

Кардендин үй-бүлөсү, ал эртең менен Париждин чет жакасында жайгашкан “Американ де Париж” ооруканасында көз жумганын басылмага билдирди.

«Бүгүн биздин үй-бүлөбүз үчүн чоң кайгы күнү, Пьер Карден жок. Улуу кутюрье бир кылымга жакын жашап, Францияга жана бүткүл дүйнөгө уникалдуу көркөм мурас калтырды», - деп түшүндүрүштү туугандары.

Пьер Карден - мода дизайнери, Pierre Cardin аталышындагы атырлар брендинин жаратуучусу жана Париждеги эң белгилүү Maxim’s ресторанынын ээси. Италиянын Сан-Биагио-ди-Каллалта коммунасында туулган. 1947-жылдан баштап Christian Dior ательесинде иштеп, 1950-жылы өзүнүн мода үйүн негиздеген.