Бишкекте жакынкы сааттарда катуу шамал болору эскертилди

Бүгүн, 24-августта Бишкек шаарында жана Чүй областында жакынкы сааттарда жана түштөн кийин катуу шамалдын жана жаандын болушу күтүлүп жатат. Бул тууралуу Өзгөчө кырдаалдар министрлигинин басма сөз кызматынан кабарлашканын “Барометр” маалымдайт.

Батыштан соккон шамалдын ылдамдыгы секундасына 15-20 метрге жетиши мүмкүн.

Кыргызгидромет борбору берген маалыматка таянсак, 24-25-августта Ысык-Көл жана Нарын областтарындагы тоолуу аймактарда нөшөрлөгөн жамгырдан улам сел жүрүү коркунучу бар. Чүй,Ош, Жалал-Абад областтарында кыска мөөнөттүү жамгыр жаап, күн күркүрөйт.