Бүгүн Кыргызстандын футбол боюнча курама командасы Непал менен беттешет

Бүгүн, 25-мартта футбол боюнча Кыргызстандын олимпиадалык курама командасы Непалда өтүп жаткан эл аралык мелдеште экинчи беттешин өткөрөт. Бул тууралуу кыргыз футбол союзунун маалыматына таянып “Барометр” билдирет.

Белгилей кетсек, Непалдын Катманду шаарында үч команданын - Непал менен Бангладештин курама командаларынын, ошондой эле Кыргызстандын олимпиадалык курама командасынын катышуусунда 2021-жылдагы Үч Улуттун Кубогу өтүп жатат.

Тайпалык этаптын экинчи айлампасынын матчында Кыргызстандын курама командасы Непал курама командасы менен ойнойт. Беттеш Бишкек убактысы боюнча саат 17:45те башталат.

Биринчи турда кыргызстандыктар Бангладеш курама командасына өз дарбазасына гол киргизип алып, утулуп калышты.

Тайпалык этаптын жыйынтыгы боюнча 1-2-орундарды ээлеген командалар финалга чыгышат.