Жеңишиң менен Кыргызстан! Айсулуу Тыныбекова онлайн чемпионатта жеңишке жетти

Эркин күрөш боюнча дүйнө чемпиону Айсулуу Тыныбекова Бириккен Күрөш дүйнөсү уюштурган онлайн чемпионатта жеңишке жетти. Бул тууралуу балбан кыздын фейсбук баракчасына жазылган маалыматка шилтеме берип “Барометр” билдирет.

“Кыргызстан жеңди. Ар бирибиз жеңдик бүгүн! Кыргыз элиме ыраазычылык айтам! Ушундай ынтымактуу жана бекем элдин ичинде болгонума кудайыма миң шүгүр! Рахмат!

292,896 добуштун ичинен 58% биздики! Тагыраак айтканда: Кыргызстандык Айсулуу Тыныбекова (170,989 добуш), ал эми Винеш Пхогат (121,907 добуш) алды”, - деп жазды Тыныбекова.

Эске сала кетсек, Бириккен күрөш дүйнөсү инстаграмм социалдык тармагындагы колдонуучулар арасында сурамжылоо жүргүзгөн. Андан соң,  добуш берүүнүн жыйынтыгы менен эң мыкты балбандарды аныктап, Кыргызстандык балбан кыз Айсулуу Тыныбекова дүйнөнүн сегиз чемпионунун  арасынан алдыга озуп чыгып, жеңишке жетишти.

Онлайн чемпионатта дүйнөнүн бир нече жолку чемпиондору ат салышты.