Өзгөндө унаадан ок жеп каза болгон эки кишинин өлүмүнө шектүү кармалды

Өзгөндө унаадан атып кетип, ооруканадан каза болгон эки кишинин өлүмүнө шектүү кармалды. Бул тууралуу Ош ОИИБдин басма сөз кызматына шилтеме берип “Барометр” билдирет.

Маалым болгондой, 19-март күнү Өзгөн шаарындагы эки жарандын өлүмү боюнча кылмыш иши ачылып, шектүүлөр издөөгө алынган.

“Кыргыз Республикасынын Жазык Кодексинин 130-беренесинин ( адам өлтүрүү) негизинде ачылган сотко чейини өндүрүш ишинин алкагында жүргүзүлгөн ыкчам-тергөө иштеринин натыйжасында Өзгөн шаарында эки жарандын өлүмүнө шектүү катары изделип жаткан кылмышка шектүүлөрдүн бири кармалды.

Сотко чейинки өндүрүш ишинин жүрушүндө Өзгөн шаарынын  тургуну, 24 жаштагы Х. А  шектүү катары кармалып, убактылуу кармоочу жайга киргизилди.

Азыркы учурда кылмышка шектүүнүн шериктерин кармоо боюнча тийиштүү иш чаралар жүргүзүлүүдө”, - деп айтылат маалыматта.

Эске сала кетсек, кече, 19-мартта түн ортосунда Өзгөндө унаада олтурган үч кишини белгисиз адамдар келип, аткылап кеткени кабарланган. Кийинчерек октон жаракат алган үч кишинин экөө оорканадан каза болгону маалым болгон.