Улукбек Кочкоров: Тилеген Рахатбеков министр катары берген тапшырмасы орундалды

Бишкектик ден соолугунан мүмкүнчүлүгү чектелген өспүрүм Тилеген Рахатбеков министр катары берген тапшырмасы ишке ашырылды. Мындан 1 ай мурда ал Эмгек жана социалдык өнүгүү министри Улукбек Кочкоровдун кабыл алуусунда болгон. Тилеген креслого отургузулуп ага убактылуу министрдин милдети жүктөлгөн. Бул учурда Кочкоровдун өтүнүчү менен Тилеген министр катары бир катар тапшырмаларды берген болчу.

Бир ай мурда Тилеген айткан тапшырмалар орундалганын министр Улукбек Кочкоров бүгүн өзүнүн facebook баракчасы аркылуу билдирди.

“Тилеген дүлөй балдар үчүн атайын орто мектеп-интернатка окуу китептери жетишсиз экенин, шахматтык доскалар зарыл экендигин айткан эле. Мен аны министрдин тапшырмасы катары кабыл алып, тапшырманы ишке ашырууга киришкенбиз. Мына 1 ай ичинде аткарганга жетиштик. Тилегендин министр катары айткан тапшырмалары тууралуу кабардар болушкан “Human Appeal International” кайрымдуулук фонду бул багытта жардам колун сунган.

Фонддун жетекчиси Али Айоуб, жеке ишкер, колунан көөрү төгүлгөн уста Жумабек Мамажанов кайрымдуулук үчүн кол сунуп, Тилегендин тилегин орундатып келдик”, - деди министр.

Улукбек Кокоров Дүлөй балдар үчүн атайын орто мектеп-интернатка бүгүн барышып, 210 миң сомдук китептин сертификаты, шахмат, шашки жана башка спорттук инвентарлар мектепке тапшырган.

Бул сапар мектептин 85 жылдык мааракесине дал келип майрамдык белек катары тапшырылган.

“Биз барган учурда Тилеген шахмат боюнча эл аралык мелдешке кетип, жолуга алган жокпуз. Эң негизгиси – биз анын тилегин орундаттык”, - деп белгилейт Улукбек Кочкоров.