Улукбек Кочкоров: Биздин максат - жарандардын жашоосун жеңилдетүү

Эмгек жана социалдык өнүгүү министри Улукбек Кочкоров Чүй облусунун Кемин жана Ысык-Ата райондорунун калкы менен жолугушту. Жолугушуу ийгиликтүү өткөнүн министр өзүнүн facebook’тагы баракчасына жазды. Министр жаңы жылдан тарта курорт, санаторийлерге жолдомону, кресло-колясканы электрондук кезек менен берүү тартиби ишке киргизилерин белгилейт.

“Мурда майыптарга курорт, санаторийлерге жолдомо (путёвка) үчүн каражат жетиштүү бөлүнбөй, миңдеген майыптар курорт, санаторияларга бара алышкан эмес. Бул жылы республика боюнча жолдомолорго 100 млн. сом (мурдагыдан 4 эсе көп) бөлүп, 10-15 жылдап жолдомого жетпей жүргөн (кээ бирлери бир да жолу барган эмес) майыптыгы бар инсандарыбызды санаторийлерге жибере баштадык”, - дейт Улукбек Кочкоров.

Жолугушууда "Курортко дарыланууга жолдомо алалбай жүрдүм эле, алдым, ырахмат", "майыптарга мамлекет бекер жолдомо берээрин билбептирмин, дарыланып келдим, ырахмат" деп министрдин атына айтылган ыраазычылыктардан улам, Кочкоров бул темага токтолгонун постунда белгилеген.

“Буга чейин майыптар министрликтин, райондук социалдык өнүгүү башкармалыктарынын эшигин каккылап жолдомо, кресло-коляска сурап келишсе, эми биз ар бир майып жарандарыбыздын эшигин каккылап, "сиздин кезегиңиз келди, бул сиздин санаторияга жолдомоңуз, бул сиздин кресло-коляскаңыз" деген принципке өтөбүз. Биздин максат - жарандардын жашоосун жеңилдетүү, - деп айтылат министрдин билдирүүсүндө.